КУЛЬТУРА ВАЧАМІ ЖУРНАЛІСТАЎ І БЛОГЕРАЎ

15 верасня Прэс-клуб сумесна з праграмай ЕС-Усходняга партнёрства «Культура і Крэатыўнасць» абвесціў аб пачатку конкурсу для журналістаў і блогераў з Беларусі «Культура важыць». Даслаць свае матэрыялы і пазмагацца за прызы запрашаюцца журналісты і журналісткі друкаваных і электронных беларускіх медыя, журналісты_ткі-фрылансеры_кі, блогеры_кі, студэнты_кі факультэтаў журналістыкі і медыя-школ.

Мы заклікаем журналістаў_так разгледзець патэнцыял культуры для эканомікі і сацыяльнага жыцця нашай краіны, пакідаючы ўбаку разуменне культуры толькі як культурнай спадчыны або высокага мастацтва. Якую ролю і ўклад маюць культура і крэатыўныя індустрыі ў Беларусі? Як культурная падзея, фестываль ці аб'ект можа змяніць успрыманне тэрыторыі – горада, раёна? Як культурныя праекты дапамагаюць у вырашэнні сацыяльна важных задач? Якія культурныя ініцыятывы дапамаглі стварыць працоўныя месцы і сталі прыбытковымі? Ці ведаюць чытачы, што, напрыклад, у Вялікабрытаніі культура і крэатыўны сектары сталі крыніцай прыбытку ў 11 млн еўра ў дзень і з'яўляюцца трэцім па велічыні працадаўцам? 

Каб прыняць удзел у конкурсе, неабходна запоўніць заўку на гэтым сайце і далучыць спасылкі на матэрыялы, упэўніўшыся, што яны адпавядаюць конкурсным вымаганням, не пазней за 14 снежня 2016 года. Работы будуць разглядацца ў трох намінацыях: «Прафесійны журналіст», «Журналіст-пачатковец», «Блогер». Лепшыя матэрыялы будуць адабраныя кампетэнтным журы, якое разам з арганізатарамі абвесціць вынікі падчас цэрэмоніі ўзнагароджання пераможцаў 23 снежня 2016 г. у Мінску.

Калі ласка, звярніце ўвагу, што канкурсант_ка, які падае артыкул ці іншы матэрыял на конкурс, аўтаматычна пагаджаецца на яго размяшчэнне на сайце конкурсу. Журналістам_кам зарэгістраваных СМІ рэкамендуем ўзгадніць гэта са сваёй рэдакцыяй перад падачай заяўкі.